Knattspyrnumaður frá Kosta Ríku lést í umferðarslysi

Dennis Marshall, 25 ára varnarmaður frá Kosta Ríku og leikmaður Álaborgar í Danmörku, lést í umferðarslysi í heimalandinu í gær.

Aðeins fimm dögum áður skoraði hann sitt fyrsta landsliðsmark þegar að Kosta Ríka tapaði fyrir Hondúras í vítaspyrnukeppni í fjórðungsúrslitum Gold Cup-keppninnar. Úrslitaleikur keppninnar, á milli Bandaríkjanna og Mexíkó, fer fram á morgun.

Marshall er sagður hafa látist eftir að bifreið hans lenti í hörðum árekstri við jeppa á fjallavegi rétt utan San Jose, höfuðborg Kosta Ríku.

„Þetta var ungur maður sem átti bjarta framtíð. Þetta er mikið áfall fyrir okkur alla,“ sagði Ricardo La Volpe, landsliðsþjálfari Kosta Ríku.