Rússneskur viðskiptajöfur keypti Portsmouth

Portsmouth hefur enn og aftur skipt um eigendur en rússneskur viðskiptamaður, Vladimir Antonov, hefur tekið yfir félagið fyrir sautján milljónir punda.

Antonov þykir umdeildur en hann hefur hagnast á bankastarfssemi og íþróttarekstri. Hann á til að mynda banka í Litháen sem fékk ekki starfsleyfi í Bretlandi eftir að fjármálayfirvöld í Bretlandi fengu ófullnægjandi svör um starfssemina.

Hann er 36 ára gamall og auðæfi metin á um 200 milljarða. Fjölskylda hans hefur verið sögð tengd skipulagðri glæpastarfssemi. Ekkert hefur þó sannast á Antonov.

Þetta er í fjórða sinn sem skipt er um eigendur hjá Portsmouth á aðeins tveimur árum. Stuðningsmenn liðsins eru nú vongóðir um að félagið komist aftur aá beinu brautina eftir mikla fjárhagserfiðleika.

Hermann Hreiðarsson landsliðsfyrirliði er á mála hjá Portsmouth og er sem stendur að skoða samningstilboð frá félaginu.