Umfjöllun: Framherjar Vals sáu um Blikana

Valsmenn unnu frábæran sigur, 2-0, gegn Íslandsmeisturum Breiðabliks í sjöttu umferð Pepsi-deild karla í knattspyrnu en leikurinn fór fram að Hlíðarenda. Matthías Guðmundsson og Hörður Sveinsson skoruðu sitt markið hvor fyrir Valsmenn í leiknum, en þeir hafa verið nokkuð kaldir fyrir framan markið í sumar, spurning hvort framherjar Valsmanna séu komnir í gang.



Leikurinn hófst með miklum látum að Hlíðarenda og heimamenn komust verðskuldað yfir eftir tíu mínútna leik. Christian Mouritsen, leikmaður Vals, átti frábæra stungusendingu inn fyrir vörn Blika, þarf var Matthías Guðmundsson einn og óvaldaður og kláraði færið vel. Smá spurning hvort Matthías hafi verið rangstæður en línuvörðurinn lyfti ekki upp flagginu og því fékk markið að standa.



Blikum var greinilega brugðið eftir markið og voru lengi að komast í takt við leikinn á ný. Valsmenn héldu áfram uppteknum hætti og sóttu stíft að marki Blika, en smá saman komust gestirnir aftur inn í leikinn og fóru að sækja að marki Valsmanna.



Síðustu 15 mínútur fyrri hálfleiksins voru heldur rólegar og staðan því 1-0 í hálfleik.

Síðari hálfleikurinn hófst með miklum látum rétt eins og sá fyrri, en á fyrstu tíu mínútum hálfleiksins fengu bæði lið urmul af færum og ótrúlegt að boltinn hafi ekki farið í netið báðum megin á vellinum.



Þegar um tuttugu mínútur voru eftir af leiknum fengu Valsmenn algjört dauðafæri og gátu í raun klárað leikinn, en Andri Fannar Stefánsson, leikmaður Vals, átti magnaða sendingu inn í vítateig Blika beint á Hörð Sveinsson sem náði fínu skoti að markinu, en Ingvar Kale, markvörður Blika, varði boltann í stöngina.



Aðeins fjórum mínútum síðar náði heimamenn aftur á móti að drepa leikinn. Hörður Sveinsson opnaði markareikninginn í sumar og kom Val 2-0 yfir. Ingólfur Sigurðsson, leikmaður Vals, átti frábært skot að markinu sem hafnaði hjá Herði sem stýrði boltanum í netið.



Frábær úrslit fyrir Valsmenn en þeir eru sem stendur með 12 stig í þriðja sæti deildarinnar aðeins tveimur stigum á eftir KR-ingum.



Blikar eru aftur á móti enn með sex stig og þurfa heldur betur að gyrða sig í brók ef þeir ætla sér að vera í toppbaráttunni í sumar og eiga möguleika á því að verja titilinn.





Valur 2 – 0 Breiðablik1-0 Matthías Guðmundsson (11.)

2-0 Hörður Sveinsson (76.)

Áhorfendur: 1358

Dómari: Magnús Þórisson 7

Skot (á mark): 11 – 9 (6-3)

Varin skot: Haraldur 3 – 4 Ingvar

Horn: 9 – 5

Aukaspyrnur fengnar: 6 – 10

Rangstöður: 5-3



Valur (4-3-3)

Haraldur Björnsson 6

Jónas Tór Næs 7

Atli Sveinn Þórarinsson 7

Halldór Kristinn Halldórsson 7

Pól Jóhannus Justinussen 6

Haukur Páll Sigurðsson 8 *maður leiksins

Sigurbjörn Hreiðarsson 5

(63. Andri Fannar Stefánsson 5)

Guðjón Pétur Lýðsson 6

Christin R Mouritsen 7

Þórir Guðjónsson 4

(45. Ingólfur Sigurðsson 7)

Matthías Guðmundsson 7

( 67. Hörður Sveinsson 7)

Breiðablik (4-3-3)

Ingvar Þór Kale 7

Arnór Sveinn Aðalsteinsson 5

(77. Rafn Andri Haraldsson - )

Finnur Orri Margeirsson 4

Elfar Freyr Helgason 4

Kristinn Jónsson 5

Guðmundur Kristjánsson 6

Jökull Elísabetarson 6

Arnar Már Björgvinsson 4

(54. Haukur Baldvinsson 5)

Andri Hrafn Yeoman 6

(77. Viktor Unnar Illugason -)

Kristinn Steindórsson 7

Dylan Jacob MacAllister 4