Fær tólf milljónir í miskabætur eftir heldur furðulegan misskilning

Það er ekki öll vitleysan eins líkt og ástralskur karlmaður hefur fengið að kynnast en hann hefur nú fengið um hundrað þúsund dollara, um tólf milljónir króna, í miskabætur frá áströlskum yfirvöldum eftir að hafa setið í fangelsi í þrjá daga í júní á síðasta ári.

Maðurinn, Neil Parry, var að koma heim til sín í Ástralíu eftir ferðalag erlendis þegar hann var handtekinn á Darwin-flugvelli. Tollverðir töldu hann vera að smygla inn dópi í sjampó-brúsum. Þeir gerðu tvo sjampóbrúsa upptæka og einn brúsa af hárnæringu. Tollverðir töldu að í brúsunum væri ekki sjampó og hárnæring heldur einhvers konar dóp í fljótandi formi.

Parry var hent í steininn og þar þurfti hann að dúsa í þrjá sólarhringa án þess að fá að ræða við lögfræðing eða segja sína skoðun á málinu. Tollurinn var hinsvegar alveg viss um að hann væri að reyna að smygla dópi inn í landið.

Hún var því heldur vandræðaleg ferðin sem lögreglan fór í fangelsið sem Parry dvaldi í þremur dögum eftir að hann var tekinn. Þar tjáði lögreglan honum að tollverðirnir hefðu haft rangt fyrir sér. Eftir að niðurstöður úr efnagreiningu bárust kom í ljós að ekkert dóp var í brúsunum, heldur einungis sjampó og hárnæring.

Nú hafa yfirvöld ákveðið að greiða Parry um tólf milljónir í miskabætur eftir að hafa setið í steininum í þrjá sólarhringa. Hvort hann fái sjampóið og hárnæringuna aftur fylgir ekki sögunni, en hann ætti að geta keypt sér nóg af sápu fyrir upphæðina.