Björn: Menn geta getið í eyðurnar

Björn Einarsson, formaður knattspyrnudeildar Víkings, segir að síðasta vika hafi verið erfið fyrir félagið.

Leifur Garðarsson var rekinn sem þjálfari liðsins í síðustu viku og var Andri Marteinsson, fyrrum þjálfari Hauka, ráðinn í hans stað í dag.

Mikið hefur verið fjallað um Víking síðustu vikurnar. Fyrst vegna Excel-skjalsins fræga sem var fyrir slysni sent á leikmannahópinn en í því var að finna umsagnir Leifs um leikmennina.

Svo var birtur pistill á Fótbolta.net í síðustu viku þar sem fjallað var um huldumanninn Albert Örn sem virtist hafa það eina hlutverk að koma Leifi Garðarssyni til varnar í netheimum. Þann sama dag var tilkynnt að Leifi hafi verið vikið úr starfi hjá Víkingi.

„Svona átti þetta ekki að vera en þegar slík mál koma upp verðum við að taka á þeim af krafti og við töldum þetta rétt mat á stöðu mála," sagði Björn í samtali við Vísi í dag.

„Það er stutt í mót og við vildum gefa nýjum manni eins mikinn tíma með liðinu og mögulegt væri."

Björn vildi ekki tjá sig með nákvæmum hætti um þær ástæður þess að Leifi var sagt upp störfum.

„Menn sem hafa fylgst með vita að það hefur ýmislegt gengið á. Við höfum ákveðið að tjá okkur mikið um þessar ástæður en menn geta svo sem getið í eyðurnar um hverjar þær voru."

„En við erum að reka öflugt félag og í vor hefst gríðarlega mikilvægt tímabil fyrir Víking. Það var of mikið af truflandi þáttum í kringum liðið og var ákvörðunin tekin með hagsmuni félagsins að leiðarljósi."

Víkingar ræddu einnig við Ásmund Arnarsson, þjálfara Fjölnis, sem ákvað að hafna boði Víkinga.

„Þegar svona vinna fer í gang gera menn ákveðinn lista og vinna eftir honum. Ásmundur hefur verið að vinna frábært starf í Grafarvoginum en það fór eins og það fór. Við erum afar ánægðir með Andra og hann hefur þann kost að bera að hann var frábær leikmaður með liðinu á sínum tíma. Við erum mjög ánægðir með að hann skuli vera kominn aftur heim."