Henderson og Doni orðaðir við Liverpool

Enski landsliðsmaðurinn Jordan Henderson er sterklega orðaður við Liverpool. Liverpool eru sagðir hafa gert tvö tilboð, síðast upp á 16 milljón pund en báðum tilboðum var hafnað af Sunderland. Talið er að Sunderland vilji 20 milljón pund fyrir leikmanninn.

Henderson skrifaði undir fimm ára samning við Sunderland á síðasta ári og því liggur Sunderland ekki á að selja hans. Á Guardian kemur hins vegar fram að Henderson sé óþreyjufullur að ganga frá sínum málum áður en Evrópumót U-21 hefst í Danmörku um helgina. Það er talið auka líkurnar á því að félögin semji um kaupverð í vikunni.

Kenny Dalglish þjálfari Liverpool er einnig sagður á höttunum eftir brasilíska markverðinum Alexander Doni hjá Roma. Doni sem hefur verið varamarkvörður fyrir Julio Sergio á undanförnum árum vill ganga til liðs við Liverpool ef marka má umboðsmann kappans Ovidio Colucci.

„Ég ræddi við Roma í gær og þeir staðfestu að þeir ættu í viðræðum við Liverpool varðandi félagsskipti Doni. Þegar niðurstaða næst í það mál göngum við frá persónulegum skilmálum við Liverpool,“ sagði Ovidio Colucci við breska fjölmiðla.  

Doni er 31 árs og yrði að öllum líkindum varamarkvörður fyrir Spánverjann José Reina.