Swansea hafði betur í Wales-slagnum

Swansea hafði betur gegn Cardiff í toppslag í ensku B-deildinni í dag. Leikurinn er ekki síður merkilegur fyrir þær sakir að bæði lið eru frá Wales.

Það var Marvin Emnes sem skoraði eina mark leiksins á 75. mínútu með góðu skoti. Þar áður hafði Scott Sinclair átt skot í stöng fyrir gestina frá Swansea.

Craig Bellamy fékk besta færi Cardiff í leiknum sem mistókst að endurheimta toppsæti deildarinnar í dag. QPR er á toppnum með 33 stig, Cardiff í öðru sæti með 32 stig og Swansea er nú með 29 stig í þriðja sætinu.

Þessi þrjú lið eru með nokkra forystu í deildinni en fjögur lið koma næst með 24 stig.

Heiðar Helguson leikur með toppliði QPR en hefur verið frá undanfarið vegna meiðsla.