Wenger hefur áhyggjur af Diaby

Arsene Wenger, knattspyrnustjóri Arsenal, viðurkennir að hann hafi áhyggjur af Abou Diab og að hann viti ekki hvenær hann muni spila á ný.

Diaby hefur verið frá síðan um miðjan október þegar hann var tæklaður af Paul Robinson í leik gegn Bolton.

„Síðan þá hefur hann aldrei náð fyrri styrk," sagði Wenger. „Við vitum ekki hversu lengi hann verður frá. Við verðum að vera þolinmóð."

Diaby hefur áður glímt við erfið meiðsli en hann fótbrotnaði og fór úr lið á ökkla í leik gegn Sunderland í maí árið 2006.