Hermann kom inn á fyrir Kanu

Hermann Hreiðarsson og félagar í Portsmouth voru nálægt því að vinna sigur á toppliði Queens Park Rangers í ensku b-deildinni í kvöld. Tommy Smith tryggði QPR jafntefli með því að skora úr vítaspyrnu í uppbótartíma leiksins.

Hermann kom inn á fyrir Nwankwo Kanu eftir að QPR skoraði jöfnunarmarkið sitt en Liam Lawrence hafði komið Portsmouth í 1-0 með marki úr víti á 71. mínútu. Heiðar Helguson lék ekki með QPR vegna meiðsla.

Aron Einar Gunnarsson lék allan leikinn með Coventry sem tapaði 2-1 á móti Nottingham Forrest á útivelli. Aron átti þátt í marki Coventry sem var fyrst skráð á hann en seinna breytt í sjálfsmark hjá Luke Chambers leikmanni Nottingham Forrest.

Forrest jafnaði leikinn sex mínútum siðar og tryggði sér síðan sigurinn í seinni hálfleik.