Bolt dreymir um að spila með Manchester United

Spretthlauparinn Usain Bolt hefur áhuga á því að gerast atvinnumaður í knattspyrnu eftir að ferli hans í frjálsíþróttum lýkur.

„Ef ég hætti þegar ég verð þrítugur gæti ég átt möguleika á að spila með liði, einhverju af smærri liðunum í ensku úrvalsdeildinni eða í neðri deildunum - bara til að athuga hvort ég gæti það. Ég hef lengi haft áhuga á því að spila. Ég væri til í að prófa og sjá hvort ég gæti eitthvað," sagði Bolt.

Bolt hefur lengi verið stuðningsmaður Manchester United og dreymir um að fá að spila með liðinu einn daginn. „Það væri mikill heiður fyrir mig að fá að spila með Wayne Rooney og liðsfélögum hans. Það var mögnuð reynsla þegar ég hitti þá í fyrsta skipti og það kom mér á óvart að þeir vissu hver ég er."

Bolt er heimsmethafi í 100 og 200 m spretthlaupi og sér fyrir sér að spila á miðjunni eða sem framherji. „Það eru reyndar margir sem segja að ég eigi að spila á kantinum," sagði hann. „Af því að ég er snöggur."