Minnihlutinn í Kópavogi klikkaði

Gísli Tryggvason, lögfræðingur, segir minnihlutaflokkana í Kópavogi líka hafa brugðist þegar ekki tókst að koma í veg fyrir spillingu í bæjarfélaginu. Brýnt sé að gera kjörna fulltrúa ábyrga fyrir störfum sínum. Gísli sækist eftir fyrsta sæti í prófkjöri framsóknarmanna í Kópavogi sem fer fram síðar í mánuðinum.

„Ég viðurkenni ábyrgð meirihlutaflokkana sem er mest en ég tel einnig að stjórnarandstaðan og eftirlitsaðilar hafi brugðist þegar svona mikil spilling og háar fjárhæðir komust í gegnum kerfið," segir Gísli og vísar til þess að náinn stuðningsmaður Gunnars I. Birgissonar, fyrrverandi bæjarstjóra, sem jafnframt gegnir starfi skoðunarmanns reikninga Kópavogs fyrir sjálfstæðismenn fékk rúmlega sjötíu milljónir króna frá bænum fyrir ýmis hönnunar- og eftirlitsstörf á árunum 2003 til 2008. Ekkert þessara verka var boðið út.

Gísli segir tillögu oddvita Samfylkingarinnar í Kópavogi, sem gengur út að breyta innkaupareglum bæjarfélagsins og lækka viðmið svo fram fari útboð, ekki ganga nógu langt. „Upphæðirnar skipta ekki endilega máli því hægt er að laga sig að þeim."

Sama gildi um stjórnmálamenn

Gísli vill þess í stað auka ábyrgð stjórnmálamanna. Brýnt sé að efla það ferli sem tekur við þegar upp koma umdeild mál.

„Það gengur ekki að forstjórar opinberra stofnanna beri ríkari ábyrgð en stjórnmálamenn. Það er hægt að víkja þeim frá störfum strax um stundarsakir og úrskurðarnefnd, sem ég hef oft setið í, ákveður hvort þeir snúi aftur," segir Gísli.

Hann vill að sama gildi um stjórnmálamenn og að sjálfstæður aðili fari yfir mál viðkomandi. „Fulltrúarnir þurfa að hafa forsendur til þess að endurmeta gjörðir eða athafnarleysi hins kjörna fulltrúa," segir Gísli. Aukaatriði sé hvort slík nefnd sé á vegum Sambands íslenskra sveitarfélga, stjórnmálaflokka, sveitarfélaga eða í tilviki Alþingis á vettvangi þingsins.