Höfnuðu ráð­gjöf um að göng undir Klettsháls yrðu í for­gangi

Vestfirski fréttamiðilinn Bæjarins besta greinir frá málinu í gær. Í frétt Bæjarins besta kemur fram að á síðasta ári hafi Fjórðungssamband Vestfirðinga fengið VSÓ ráðgjöf til þess að greina samgönguumbætur á Vestfjörðum, bæði vegaframkvæmdir og jarðgangagerð, með það að markmiði að samgönguverkefnum væri hægt að forgangsraða eftir áherslum svæðisskipulagsnefndar Vestfjarða.

Bæjarins besta birti raunar þegar í fyrrahaust frétt um minnisblað VSÓ ráðgjafar þar sem jarðgöng í gegnum Klettsháls voru efst á blaði með hæstu einkunn. Fjórðungssambandið neitaði þá að afhenda fréttamiðlinum minnisblaðið með þeim rökum að það væri vinnugagn. 

Fáum vikum síðar, í byrjun desember, kynnti innviðaráðherra samgönguáætlun þar sem Súðavíkurgöng, milli Ísafjarðar og Súðavíkur, voru sett í fyrsta sæti jarðganga innan Vestfjarða og göng undir Hálfdán og Mikladal í annað sæti en þau tengja Patreksfjörð, Tálknafjörð og Bíldudal.

Í þessari frétt frá því í desember má heyra rökstuðning innviðaráðherra fyrir valinu:

Í samgönguáætlun ríkisstjórnarinnar voru jarðgöng undir Klettsháls hins vegar sett mun aftar í röðina og fóru á lista ellefu jarðgangakosta á landinu öllu til skoðunar síðar. Vegagerðin hefur engu að síður bent á að Klettsháls sé sá fjallvegur þjóðvegakerfisins á jarðgangalistanum sem býr við flesta lokunardaga á ári.

Samkvæmt frétt Bæjarins besta fengu jarðgöng undir Klettsháls samanlagða einkunn ellefu í minnisblaði VSÓ. Klettshálsgöng fengu hæstu einkunn í þremur þáttum af fjórum; öryggi, kostnaði og samfélagslegum áhrifum.

Í athugasemdum VSÓ sagði að langar og tíðar lokanir á Klettshálsi yfir veturinn væru vandamál sérstaklega þar sem engir þéttbýliskjarnar væru nálægt hálsinum. Þá sagði að, ef ekki væri talin þörf á Breiðafjarðarferjunni Baldri eftir jarðgöngin, væri sparnaður fólginn í gerð jarðganganna sem gerði þau að ákjósanlegri kosti.

Jarðgöng milli Ísafjarðar og Súðavíkur voru í öðru sæti í forgangsröðun VSÓ með einkunnina átta. Sá kostur varð efstur í tímasparnaði en bent var á að ef umferðin færi að miklu leyti frá Djúpinu og færi þess í stað vesturleiðina myndi einkunnin lækka um eitt stig vegna tímasparnaðar og verða þá jafnsett Breiðadalslegg með sjö stig.

Fram kemur að mat VSÓ-ráðgjafar hafi tekið til styttingar aksturstíma, öryggis og samfélagslegra áhrifa. Jarðgangakostir hafi auk þess verið metnir út frá fjárhagslegum áhrifum. Markmið ráðgjafarinnar hafi verið að gefa greinargóða yfirsýn yfir mögulegar vegabætur á Vestfjörðum og forgangsraða þeim á hlutlausan máta.

Nú þegar Klettshálsgöngum hefur verið ýtt til hliðar er áherslan á Súðavíkurgöng. Þar hafa valkostir til skoðunar verið þrengdir niður í tvo, sem fjallað var um í þessari frétt fyrir hálfu ári: