Halldór Jónsson: Þegar skamma á Moskvu verður Albanía fyrir valinu

Verkfræðingurinn Halldór Jónsson svarar ásökunum eigin flokksmanna um óeðlileg viðskipti fyrirtækis á hans vegum við Kópavogsbæ í pistli á bloggi sínu í dag. Þar lætur hann að því liggja að árásir á hann séu í raun pólitískar árásir á Gunnar Birgisson, fyrrum bæjarstjóra Kópavogs, en hann sækist eftir fyrsta sætinu í prófkjöri Sjálfstæðismanna í Kópavogi.

Gunnsteinn Sigurðsson, bæjarstjóri Kópavogs og samflokksmaður Halldórs, hefur óskað eftir úttekt á því hvernig staðið var að ráðningu Halldórs. Ómar Stefánsson, bæjarfulltrúi framsóknarmanna, segir Halldór rúinn trausti. Málið verður tekið upp á fundi bæjarráðsins á fimmtudag. Þess má geta að Gunnsteinn hefur lýst opinberlega stuðningi við Ármann Kr. Ólafsson sem sækist einnig eftir fyrsta sætinu í prófkjörinu.

Þá hefur Guðríður Arnardóttir, bæjarfulltrúi Samfylkingarinnar, segir að fyrirtæki Halldórs hafi verið færð verk á silfurfati en samkvæmt fréttum undanfarið hefur fyrirtæki Halldórs fengið greiddar 71,5 milljónir króna fyrir sjö framkvæmdir á vegum bæjarins á fimm ára tímabili til 2008.

Á bloggi sínu ritar Halldór: „[...]. En það er auðvitað svo, eins og var í gamla daga, að vildu Kínverjar rakka niður Moskvuvaldið, þá skömmuðu þeir Albaníu. Auðvitað sjá menn í gegnum skothríðina á mig hvern drullan hæfir ef ég beygi mig."

Halldór bætir svo við: „Þetta er nokkuð nýstárleg aðferð í prófkjörum hér í Kópavogi en eftir er að sjá hvaða áhrif þetta hefur. Öll leðja loðir eitthvað við þann sem fyrir verður en samt verða þeir sem kasta venjulega eitthvað blakkir á höndunum þá þeir sýni hvíta hanska útá við og þykist hvergi nærri koma."

Að lokum segir Halldór: „Ég ætla ekki að elta ólar að sinni við fólkið á sem situr á skítadreifaranum og keyrir um völlinn víðan. Ég sit á mér fram yfir helgi og vona að enginn verði yfir sig spenntur. En ég er alls ekki búinn að missa málið ef þeir halda það."