Brýnt að breyta innkaupareglum Kópavogs

Guðríður Arnardóttir, oddviti Samfylkingarinnar í Kópavogi, segir brýnt að breyta innkaupareglum bæjarfélagsins. Hún hefur lagt fram tillögu í bæjarráði sem gerir ráð fyrir að útboð verði viðhaft vegna verklegra framkvæmda umfram 10 milljónir. Viðmiðið í dag er 20 milljónir.

Undanfarin ár hafa ýmsar greiðslur Kópavogsbæjar til verktaka verið umdeildar. Til að mynda riðaði meirihluti Sjálfstæðis- og Framsóknarflokks til falls síðasta sumar vegna viðskipta bæjarfélagsins við fyrirtæki í eigu dóttur Gunnars I. Birgissonar, þáverandi bæjarstjóra. Nýjasta málið snýr að stuðningsmanni Gunnars sem gegnir starfi skoðunarmanns reikninga bæjarins fyrir hönd sjálfstæðismanna. Hann fékk rúmlega sjötíu milljónir króna frá Kópavogsbæ fyrir ýmis hönnunar- og eftirlitsstörf á árunum 2003 til 2008. Ekkert þessara verka var boðið út.



Mikilvægt að tryggja hagstæðustu verðin

„Ég tel brýnt að verkferlar og gegnsæi séu bættir vegna kaupa á vöru og þjónustu til að tryggja hagstæðustu verðin. Auk þess mun ég leggja til í framhaldinu að vegna kaupa á þjónustu og vörukaupa undir þessum viðmiðum verði skilyrðislaust leitað verðtilboða, nema rökstuðningur liggi fyrir sé annað ákveðið," segir Guðríður.

Guðríður vill að fram fari útboð þegar áætluð fjárhæð vegna kaupa Kópavogsbæjar á þjónustu fer yfir 5 milljónir en viðmiðið í dag er 15 milljónir. Hún telur auk þess að vörukaup eigi að miðast við 2,5 milljónir í stað 10 milljóna. Guðríður segir að þetta séu samskonar viðmiðunarfjárhæðir og eru í Hafnarfirði og að þær séu enn lægri á Akureyri.

Tillaga Guðríðar gerir ráð fyrir að fjárhæðirnar breytist með hliðsjón af byggingarvísitölu. Á síðasta bæjarráðsfundi var tillögunni vísað til bæjarlögmanns til umsagnar.