Davids farinn frá Crystal Palace

Hollendingurinn Edgar Davids er farinn frá Crystal Palace eftir stutta dvöl hjá félaginu. Hann er 37 ára gamall og gekk til liðs við félagið í ágúst síðastliðnum.

Þá hafði hann verið án félags í tvö ár og kom það mörgum á óvart þegar hann samdi við Crystal Palace sem leikur í ensku B-deildinni.

Hann náði sér þó aldrei á strik með félaginu og náði aðeins að spila sjö leiki alls. „Í dag hef ég ákveðið að binda enda á dvöl mína hjá Crystal Palace," skrifaði hann á heimasíðu sína. George Burley, stjóri Crystal Palace, segir að þetta hafi verið tímabært.

„Þetta er frábær drengur og ég naut þess að vinna með honum. En þetta reyndist honum ofviða eftir að hafa ekki spilað í tvö ár. Við verðum að horfa til framtíðar og ég mun nú reyna að fá leikmann í hans stað," sagði Burley.

Davids spilaði lengst af með Juventus á Ítalíu en einnig með AC Milan, Barcelona, Inter og Ajax. Hann lék á sínum tíma 74 leiki með hollenska landsliðinu.