Þorvaldur: Mál Hannesar í skoðun

Þorvaldur Örlygsson segir að Fram sé nú með leikmannamál liðsins í skoðun en nokkrir leikmenn eru nú að renna út á samningi.

Meðal þeirra leikmanna sem eru með lausan samning eru þeir Joe Tillen, Jón Orri Ólafsson, Alexander Veigar Þórarinsson og markvörðurinn Hannes Þór Halldórsson.

„Við munum kíkja á alla samninga og reyna að halda sem flestum. Það kemur í ljós hvað verður en það má alltaf reikna með einhverjum breytingum og svo eru líka ávallt einhverjar pælingar í gangi. En það er lykilatriði að halda kjarnanum."

Hannes sagði í samtali við Vísi í gær að hann myndi skoða alla möguleika, til að mynda KR eins og hann hefur verið orðaður við.

„Við skoðum það í vikunni hvort hann verði boðinn nýr samningur," sagði Þorvaldur um mál Hannesar. „Það er í skoðun."