Schalke vill fá Michael Owen

Þýska úrvalsdeildarfélagið Schalke er sagt í frönskum fjölmiðlum í dag vilja fá Michael Owen frá Manchester United þegar félagaskiptaglugginn opnar um áramótin.

Owen hefur átt við þrálát meiðsli að stríða á undanförnum árum og spilaði síðast með United í byrjun október, í markalausu jafntefli gegn Sunderland.

Schalke hefur byrjað skelfilega í þýsku úrvalsdeildinni í haust en er þó komið úr fallsæti eftir að hafa ekki tapað í þremur leikjum í röð. Síðast vann liðið 4-0 sigur á Werder Bremen þar sem Raul skoraði þrennu.

Raul og Owen voru einmitt samherjar hjá Real Madrid á sínum tíma.