Heimir: Mikil stemning í liðinu

Heimir Hallgrímsson, þjálfari ÍBV, gat leyft sér að brosa eftir sigurinn á Fram í dag enda er ÍBV komið aftur á toppinn.

„Ég er bara gífurlega sáttur við leik liðsins í dag, það var enginn að bera af en allir að standa sig vel.Við vissum að þeir væru sterkir í loftinu og mjög þéttir fyrir og við reyndum að teygja á þeim og fórum upp kantana. Við náðum líka að loka vel á þeirra sóknarleik, þeir áttu engin dauðafæri og voru í raun ekkert líklegir, og við gerðum vel með að sýna þolinmæði og það skilaði sér með góðu marki," sagði Heimir kátur.

„Það er mikil stemmning í liðinu og það eru í raun engin brögð á bakvið það. Strákarnir eru að sjá um það mikið sjálfir bæði þeir sem eru inn á vellinum og þeir sem eru utan vallar. En okkur gengur vel og við ætlum að halda áfram að gera þá hluti sem við höfum verið að gera vel.“