Moskvuárásir: Óánægja með sjónvarpsstöðvarnar

Rússar eru óánægðir með sjónvarpsstöðvar landsins sem þyka hafa staðið sig með eindæmum illa þegar hryðjuverkamenn sprengdu sig í loft upp í neðanjarðarlestakerfi Moskvuborgar á mánudaginn. Þegar fregnirnar bárust út af árásunum hópuðust rússar að sjónvarpstækjum sínum til þess að fá upplýsingar um ástandið. Á sjónvarpsstöðvunum sem hliðhollar eru ríkisstjórninni var hins vegar lítið að frétta og aðeins matreiðsluþættir og sápuóperur á dagskrá eins og venjulega.

Um var að ræða verstu hryðjuverkaárás í borginni í áraraðir og lamaðist samgöngukerfi Moskvu nær algerlega með tilheyrandi töfum. Stærsta stöðin sagði stuttlega frá árásunum klukkan hálf níu um morguninn en síðan var ekki minnst á þær fyrr en í hádegisfréttum. Talskona stöðvarinnar segir að ástæða þess sé sú að það hafi „ekkert nýtt" verið að frétta af málinu. Engin þörf var á því að rjúfa hina venjubundnu dagskrá vegna þess að „meirihluti fólks fer til vinnu sinnar fyrir klukkan níu á morgnana og það eru aðeins húsmæður sem horfa á sjónvarpið eftir það," sagði talskonan.

Þeir sem vildu afla sér frekari upplýsinga urðu því að reiða sig á útvarpsstöðvarnar og internetið.