Innlent

Biskup rúinn trausti

Jón Hákon Halldórsson skrifar
Andrés Jónsson almannatengill telur stöðu biskups vera veika.
Andrés Jónsson almannatengill telur stöðu biskups vera veika.
Staða Karls Sigurbjörnssonar biskups er mjög veik, segir Andrés Jónsson, formaður Almannatengslafélags Íslands. Karl hefur staðið í miklum ólgusjó undanfarna sólarhringa vegna umræðu um kynferðisbrot innan Þjóðkirkjunnar.

„Traust á stofnunum samfélagsins er almennt í sögulegu lágmarki og ríkari kröfur eru gerðar um trúverðugleika þeirra sem veita þessum stofnunum forystu," segir Andrés. Hann bendir á að Karl hiki ennþá við að setja Geir Waage af vegna glórulausra ummæla hans um þagnarskyldu presta gagnvart barnaníðingum. „Það logar allt vegna þessara ummæla," segir Andrés.

Andrés segir að málefni tengd Ólafi Skúlasyni, fyrrverandi biskupi, séu Karli ekki síður erfið. Í yfirlýsingu sem Karl sendi í gær hafi hann reynt að feta einstigið milli þess að bregðast við sögum kvenna af kynferðisbrotum og þess að fordæma Ólaf Skúlason. „Svo virðist sem ráðgjafar Karls hafi talið að tengsl hans við mál Ólafs gerðu honum erfitt fyrir að taka djúpt í árinni án þess að hann varpaði um leið skugga á eigin vinnubrögð í málinu. Persónulega þótti mér þetta ekki góð yfirlýsing og af viðbrögðum að dæma gerði hún ekkert til að slökkva óánægju, hvorki innan né utan kirkjunnar," segir Andrés. Náðarhöggið hafi svo komið í dag þegar í ljós kom að Karl fór rangt með málavöxtu í máli kvennanna sem sökuðu Ólaf um kynferðisbrot. „Eftir situr biskup rúinn trausti," segir Andrés.

Andrés telur þó að Karl eigi nokkuð inni hjá þjóðinni fyrir mannlega framkomu sína í mörgum málum. „En um leið hefur hann sýnt það núna og svo sem áður í málum tengdum giftingum samkynhneigðra að hann neitar að hlusta á tíðarandann," segir Andrés.




Tengdar fréttir

Aukinn áhugi á úrsögnum úr kirkjunni

Starfsfólk Þjóðskrár Íslands verður vart við stíganda í fyrirspurnum frá fólki um það hvernig eigi að bera sig að við úrsagnir úr Þjóðkirkjunni. Þetta segir Haukur Ingibergsson, forstjóri stofnunarinnar, í samtali við Vísi.

Fórnarlamb Ólafs Skúlasonar vill sannleiksnefnd

Sigrún Pálína Ingvarsdóttir skorar á þjóðkirkjuna að setja saman sannleiksnefnd til að komast til botns í máli Ólafs Skúlasonar en Sigrún segir Karl Sigurbjörnsson biskup og Hjálmar Jónsson sóknarprest hafa reynt að sannfæra hana um að láta af ásökunum sínum á hendur Ólafi árið 1996.

Dómsmálaráðherra fundar með biskupi

Ragna Árnadóttir, dómsmála- og mannréttindaráðherra, fundar í dag með Karli Sigurbjörnssyni biskupi um málefni þjóðkirkjunnar. Tilefnið segir Ragna vera þau ummæli Geirs Waage, sóknarprests í Reykholti, að þagnarskylda presta sé hafin yfir landslög, jafnvel í tilfelli kynferðisbrota gegn börnum.

Biskup: Æðri dómstólar fara yfir mál séra Ólafs

Karl Sigurbjörnsson biskup segir að á Íslandi séu menn saklausir uns sekt þeirra sé sönnuð, kirkjan geti því lítið aðhafst í tengslum við ásakanir á hendur forvera sínum, Ólafi Skúlasyni. Aðrir og æðri dómstólar fari yfir hans mál.

Ábyrgðin hjá biskupi

Þjóðkirkjan verður sjálf að leysa úr þeim málum sem á borði hennar eru núna. Þetta er niðurstaða Rögnu Árnadóttur, dóms- og mannréttindamálaráðherra. Hún fundaði með Karli Sigurbjörnssyni biskupi Íslands um málefni Þjóðkirkjunnar í dag. „Ég hef skoðað þessi mál því ég vildi fullvissa mig um það hverjar skyldur ráðuneytisins eru í þessu máli. Það er alveg ljóst að þau verða alfarið leyst innan Þjóðkirkjunnar,“ segir Ragna.

Starfsmenn kirkjunnar þurfa að heimila aðgang að sakaskrá

Þjóðkirkjan er nú að fara af stað með átak þar sem allir starfsmenn kirkjunnar verða beðnir um að samþykkja að heimila aðgang að sakaskrá með tilliti til kynferðislegs ofbeldis. Þetta kemur fram í yfirlýsingu sem Kirkjuráð sendi frá sér í dag.

Séra Bjarni: Sjónarmið Geirs Waage varðar brottrekstur

„Það er háskalegt og varðar hreinan brottrekstur úr prestsembætti að halda fram því sem sr. Geir Waage gerir," segir séra Bjarni Karlsson, sóknarprestur í Laugarneskirkju, um þá skoðun Geirs að þagnarskylda presta gagnvart sóknarbörnum sé algjör og þar sé engan milliveg að finna.

Prestur krefst rannsóknar á þöggun kirkjunnar

Sigríður Guðmarsdóttir sóknarprestur vill að kirkjan viðurkenni vanmátt sinn í máli Sigrúnar Pálínu Ingvarsdóttir og að óháð sannleiksnefnd verði skipuð til að fara yfir málið í heild sinni.

Skriftarbarn getur ekki bundið samvisku prestsins

Biskup Íslands, Karl Sigurbjörnsson, hefur sent frá sér yfirlýsingu vegna greinar séra Geirs Waage og birtist í Morgunblaðinu í morgun. Þar sagði Sveinn að þagnarskylda presta gagnvart sóknarbörnum væri algjöra og þar væri engan milliveg að finna.

Geir Waage: Ríkari trúnaðarskylda gildir um presta

Geir Waage, prestur í Reykholti segir að tilkynningaskylda presta hafi litla raunhæfa þýðingu því án trúnaðar verði prestum aldrei trúað fyrir nokkru. Hann segir ríkari trúnaðarskyldu lagða á presta. Þetta kemur fram í grein sem Geir ritar í Morgunblaðið í dag.

Sigrún Pálína: Karl og Hjálmar reyndu að þagga niður í mér

Sigrún Pálína Ingvarsdóttir segir að eftir misheppnaðar sáttatilraunir við Ólaf Skúlason, þáverandi biskup, hafi Karl Sigurbjörnsson, núverandi biskup, og Hjálmar Jónsson, núverandi Dómkirkjuprestur, reynt að þagga niður í henni. Karl hafi meðal annars vísað til þess að hún ekki gert sjúkri móður sinni það að halda málinu til streitu. Sjálfur segist Karl ekki hafa tekið þátt í að beita Sigrúnu óeðlilegum þrýstingi til að fá hana til að falla frá ásökunum sínum.

Biskup harmar rangfærslur

Karl Sigurbjörnsson, biskup Íslands, harmar mistök sem hann gerði í yfirlýsingu sem hann sendi fjölmiðlum í gær. Þar sagði Karl að hafa verði í huga að Sigrún Pálína Ingvarsdóttir, sem sakaði Ólaf Skúlason fyrrverandi biskup um kynferðisbrot gegn sér fyrir fjórtán árum, hefði kært Ólaf til ríkissaksóknara sem hafi ekki talið efni til að birta ákæru í málinu. Hið rétta er að Ólafur krafðist að fram færi opinber rannsókn rangs sakburðar og ærumeiðandi aðdróttana Sigrúnar og annarra kvenna.

Sakar biskup um rangfærslur

Sigrún Pálína Ingvarsdóttir, sem sakaði Ólaf Skúlason fyrrverandi biskup um kynferðisbrot gegn sér fyrir fjórtán árum, sakar Karl Sigurbjörnsson núverandi biskup um rangfærslur í orðsendingu til fjölmiðla í gær. Þar sagði Karl að hann hefði ekki tekið þátt í því að þagga mál Sigrúnar Pálínu niður.

Mest lesið


Fleiri fréttir

Sjá meira


×

Mest lesið