Séra Bjarni: Sjónarmið Geirs Waage varðar brottrekstur

„Það er háskalegt og varðar hreinan brottrekstur úr prestsembætti að halda fram því sem sr. Geir Waage gerir," segir séra Bjarni Karlsson, sóknarprestur í Laugarneskirkju, um þá skoðun Geirs að þagnarskylda presta gagnvart sóknarbörnum sé algjör og þar sé engan milliveg að finna.

Ummæli Bjarna má finna á bloggsvæði hans en þar vandar hann séra Geir ekki kveðjurnar.

Bjarni skrifar: „Nú gengur sr. Geir Waage fram og lýsir sig reiðubúinn í nafni síns prestsembættis að þegja yfir níðingsskap á börnum. Mig setur hljóðann."

Séra Bjarni áréttar svo að prestar séu, og hafi lengi verið, beinir aðlilar að barnaverndarstarfi í landinu. Þá segir hann að prestum beri að taka það skýrt fram við hvern þann sem vilji trúa honum fyrir unnu ódæði gagnvart börnum, að hann virði ekki trúnað um slíkt undir nokkrum kringumstæðum.

Séra Bjarni gagnrýnir biskup og kirkjuráð harðlega í tengslum við mál Ólafs Skúlasonar auk þess sem hann vill að biskup beiti sér af einurð í máli Geirs Waage.

Orðrétt segir Bjarni: „Máttlaus viðbrögð hans [Innskt.blm. Karls Sigurbjörnssonar biskups] og kirkjuráðs undanfarna daga í tengslum við mál Ólafs Skúlasonar eru þó ekki til þess fallin að vekja mikla von í þeim efnum. Það verður að segja það eins og það er."

Pistilinn má lesa hér.