Hodgson: Þurfum að fá nýjan framherja

Roy Hodgson, stjóri Liverpool, viðurkennir að félagið þurfi sárlega að fá nýjan framherja til þess að styðja við bakið á Fernando Torres. Hodgson gerir sér þó grein fyrir því að hann gæti þurft að bíða fram á næsta sumar eftir nýjum framherja.

Hodgson hefur reynt að fá framherja síðan hann kom til félagsins og hefur gefið mönnum eins og Carlton Cole, Mario Gomez og Ola Toivonen auga.

Enginn framherji kom til félagsins í sumar og félagið þarf því að reiða sig á David Ngog sem verður seint kallaður markamaskína.

"Við höfum reynt að vernda Torres eins og við getum og gefa honum þá hvíld sem hann hefur þarfnast. Ég hef gefið honum og Gerrard oftast frí í Evrópuleikjunum," sagði Hodgson.

"Við búum samt ekki við þann munað að gefa honum endalaust frí. Ég hef trú á Ngog en það er erfitt að velja hann í liðið þegar Fernando er heill heilsu. Við þurfum að skoða framherjamálin í janúar en það gæti dregist að við fáum nýjan framherja."