Reina gefur í skyn að hann vilji fara frá Liverpool

Pepe Reina, markvörður Liverpool, hefur gefið í skyn í samtali við enska fjölmiðla að til greina komi að fara frá liðinu þegar tímabilinu lýkur næsta sumar.

Reina hefur undanfarnar vikur verið orðaður við ýmis lið, rétt eins og aðrir sterkir leikmenn hjá Liverpool.

„Fyrir sjö mánuðum skrifaði ég undir sex ára samning við félagið og ég er ánægður hjá félaginu. En alla knattspyrnumenn langar til að vera í toppbaráttu og vinna titla," er haft eftir Reina í Daily Mail í dag.

„Ég mun vera áfram í Liverpool til loka tímabilsins að minnsta kosti."

„Ég veit að það hefur verið orðrómur á kreiki um að ég kunni að fara en ég vil gera öllum ljóst að ég er ekki aftur á leið til Spánar."

Reina hefur einnig lýst yfir vonbrigðum sínum með að Rafa Benitez fór frá félaginu í sumar.

„Rafael Benitez var mikilvæg persóna í þessu félagi og ástæðan fyrir því að ég kom til Liverpool á sínum tíma," sagði Reina.