RÚV: Eiður Smári á leið frá Stoke

Fréttastofa Ríkissjónvarpsins hefur það eftir sínum heimildum að Eiður Smári Guðjohnsen hafi komist að samkomulagi við forráðamenn Stoke City í Englandi um starfslok.

Ítrekað hefur verið fjallað um hversu lítið Eiður Smári hefur fengið að spila hjá Stoke síðan hann kom til félagsins á lokadegi félagaskiptagluggans í sumar.

Hann hefur reyndar aldrei fengið tækifæri í byrjunarliði Stoke og aðeins komið inn á sem varamaður í fjórum deildarleikjum, síðast í október. Hann lék í um klukkutíma með Stoke gegn West Ham í ensku deildabikarkeppninni þann 27. október síðastliðinn. Síðan þá hefur hann ekkert spilað, nema með varaliðinu.

Eiður gekk í raðir Stoke frá franska félaginu Monaco í sumar. Tony Pulis, stóri félagsins, hefur reyndar greint frá því að franska félagið greiði enn hluta launa hans.

Pulis hefur einnig oft fullyrt að Eiður Smári sé ekki í nægilega góðu formi fyrir átökin í ensku úrvalsdeildinni og segir aðalástæðuna vera að hann sé of þungur.

Eiður á glæsilegan feril að baki og varð tvívegis Englandsmeistari með Chelsea. Árið 2006 var hann keyptur til Barcelona og varð hann spænskur meistari, spænskur bikarmeistari og Evrópumeistari með félaginu.

Hann gekk í raðir Monaco árið 2009 en þar náði hann sér aldrei á strik. Hann var lánaður til Tottenham á síðari hluta síðasta tímabils og skoraði þá tvö mörk.

Ekki náðist í Arnór Guðjohnsen, umboðsmann og föður Eiðs Smára, við vinnslu fréttarinnar, né heldur Eggert Skúlason, fjölmiðlafulltrúa hans.