Stoke íhugar að fá lánaðan framherja frá Ítalíu

Tony Pulis mun nú vera að íhuga að fá að láni framherjann Stefano Okaka, leikmann Roma á Ítalíu, þegar félagaskiptaglugginn opnar í janúar.

Í enskum fjölmiðlum er fullyrt að Pulis vilji eiga fleiri kosti í framlínu liðsins. Hann eigi í dag aðeins tvo raunhæfa kosti, þá Kenwyne Jones og Ricardo Fuller.

Eiður Smári Guðjohnsen hefur ekki verið í náðinni hjá Pulis í haust sem hefur ítrekað fullyrt að hann þurfi meiri tíma til að komast í almennilegt form áður en hann getur spilað á ný.

Pulis hefur þó fleiri kosti í sókninni því bæði Jonathan Walters og Tuncay Sanli standa honum til boða. Hins vegar er Malímaðurinn Mamady Sidibe frá vegna meiðsla út tímabilið.

Ef að Stoke bætir öðrum framherja við leikmannahópinn í janúar er ljóst að Eiður Smári á það á hættu að falla enn aftar í goggunarröðinni. Eiður spilaði síðast með aðalliði Stoke í lok október, í 3-1 tapi fyrir West Ham í ensku deildabikarkeppninni.