Redknapp vongóður um að halda Bale

Harry Redknapp, stjóri Tottenham, er vongóður um að halda stórstjörnunni Gareth Bale hjá félaginu þó svo að liðinu myndi ekki takast að tryggja sér þátttökurétt í Meistaradeild Evrópu fyrir næstu leiktíð.

Bale hefur verið frábær á tímabilinu og átti tvo stórleiki þegar að Tottenham lék við Evrópumeistara Inter í Meistaradeildinni.

Redknapp er sagður reiðubúinn að bjóða Bale nýjan og betri samning en hann er þegar samningsbundinn félaginu til 2014.

„Ég hef ekki áhyggjur af þessu og það er bara frábært að leikmaður Tottennham skuli vekja svo mikla athygli," sagði Redknapp í pistli sínum í The Sun.

„Ég skil vel að Gareth skuli fá þessa athygli enda er það eðli knattspyrnunnar. En trúið mér, hann er ekki á leiðinni frá Spurs. Jafnvel þótt okkur takist ekki að fara aftur í Meistaradeildina á næstu leiktíð."

„Ég held að Gareth hafi ekki áhuga á að vera hjá öðru félagi. Hann veit að hann er hjá félagi sem er á uppleið."