Tevez neitar frétt um þunglyndi

Talsmaður Carlos Tevez segir það alrangt að Carlos Tevez hafi verið í meðferð hjá sálfræðingi eins og kom fram í enska götublaðinu The Sun í gær.

The Sun hélt því fram að Carlos Tevez sé þunglyndur og að hann hafi hitt sálfræðing á meðan hann dvaldi í Argentínu á dögunum.

Argentínumaðurinn Tevez er 26 ára gamall leikmaður Manchester City en er sagður þjást af mikilli heimþrá. Hann er fráskilinn en tvær dætur hans, fimm ára og átta mánaða, búa með móður sinni í Argentínu.

„Það er ekki eitt sannleikskorn í þessari frétt," sagði talsmaðurinn. „Carlos er mjög sár vegna þessa staðhæfinga."

„Auðvitað saknar hann dætra sinna, rétt eins og hvaða faðir sem er í hans stöðu. En það sem hefur verið gefið í skyn í þessari frétt er einfaldlega ósatt."

Tevez er nú kominn aftur til Manchester en ólíklegt er að hann verði með City í leiknum gegn West Brom á morgun.