Fabregas: Megum ekki misstíga okkur í kvöld

Cesc Fabregas, fyrirliði Arsenal, segir að Arsenal megi alls ekki við því að misstíga sig frekar í toppslagnum ætli félagið að halda sig þar. Arsenal mætir Wolves í kvöld.

Arsenal tapaði óvænt gegn Newcastle um helgina en það var þriðja tap liðsins í deildinni í vetur. Arsenal er fimm stigum á eftir toppliði Chelsea.

"Það eru leikir eins og í kvöld sem geta skorið úr um hvort maður verði meistari eða ekki. Þetta snýst ekki bara um vinna stóru leikina. Það þarf að vinna þessa leiki líka," sagði Fabregas.

"Það var mjög slæmt að tapa gegn Newcastle. Við sögðum eftir tapið gegn WBA að við mættum ekki misstíga okkur aftur og svo töpum við gegn Newcastle. Við gerum okkur grein fyrir því að ein mistök í viðbót geta þýtt að við erum úr leik."