Alfreð: Tileinkum Ólafi og bróður hans titilinn

Alfreð Finnbogason mátti sætta sig við að sitja upp í áhorfendastúku og fylgjast með sínum mönnum gera markalaust jafntefli við Stjörnuna í Garðabænum í dag.

Sem betur fer fyrir Alfreð, sem var í banni í dag, dugði jafnteflið til að tryggja Blikum Íslandsmeistaratitilinn.

„Það var mjög erfitt að sitja upp í stúkunni en sem betur fer hafðist þetta," sagði Alfreð við Vísi eftir leikinn.

„Þetta tímabil hefur verið frábært og ég sé alls ekki eftir því að hafa tekið eitt ár til viðbótar á Íslandi," bætti hann við en Alfreð var orðaður við nokkur erlend félög bæði síðastliðið haust og í sumar.

Hann varð markahæsti leikmaður deildarinnar með fjórtán mörk og fær markakóngstitilinn.

„Það er frábær viðbót við þennan glæsilega árangur. Ég er gríðarlega stoltur."

Hann segir að Ólafur Kristjánsson, þjálfari, eigi mikið í árangri liðsins.

„Hann á þetta alveg skuldlaust. Við tileinkum honum þennan titil sem og bróður hans, Hrafnkatli, sem lést seint á síðasta ári," sagði Alfreð.