Harper meiddist í fagnaðarlátum

Steve Harper, markvörður Newcastle, gerði axlarmeiðsli sín enn verri þegar hann var að fagna einu marka sinna manna í grannaslagnum gegn Sunderland um síðustu helgi.

Harper meiddist á öxl í leik gegn Everton í september síðastliðnum og þurfti að gangast undir aðgerð vegna þessa.

Hann reyndar varð fyrir því óláni að seinka bataferlinu og gera meiðslin enn verri þegar hann fagnaði einu marka sinna manna í 5-1 sigrinum á Sunderland.

„Ég meiddi mig þegar ég var að fagna fjórða markinu," viðurkenndi hann í samtali við enska fjölmiðla. „Þegar allir aðrir voru að fagna markinu var ég nálægt því að fara að gráta. En ég skal glaður meiða mig þegar tilefnið er svona gott."

„En mér líður vel," sagði Harper sem stefnir að því að vera kominn aftur á fullt um næstu mánaðamót. „Ég get beitt mér á allan hátt og nú þarf ég bara að ná fullum styrk aftur. Vonandi verð ég kominn aftur af stað eftir þrjár vikur."