Frækinn sigur Newcastle gegn Arsenal á Emirates

Newcastle vann frækinn sigur á Arsenal, 0-1, á Emirates vellinum í dag og kemst fyrir vikið upp í 4. sæti ensku úrvalsdeildarinnar. Arsenal voru miklu mun betri í leiknum en náðu ekki að skapa sér mörg færi gegn sterki vörn nýliðanna.

Ekki var mikið um markfæri í fyrri hálfleik þó heimamenn í Arsenal væru mun sterkari og líklegri. Tim Krul þurfti að taka á honum stóra sínum þegar hann varði skot Samir Nasri af stuttu færi meistaralega. Það var því nokkuð gegn gangi leiksins þegar vandræðagemsinn Andy Carroll skoraði með góðum skalla í uppbótatíma í fyrri hálfleik. Lukasz Fabianski, markvörður Arsenal, hefði e.t.v. átt að gera betur.

Arsenal fengu fá góð færi í síðari hálfleik og til að bæta gráu ofan á svart þá fékk Laurent Koscielny, varnarmaður Arsenal, að líta rauða spjaldið í uppbótatíma þegar hann reif niður Nile Ranger sem var við það að sleppa einn í gegnum vörn Arsenal. Þetta er í annað sinn sem Koscielny lítur rauða spjaldið í ensku deildinni í vetur.

Arsenal er í 3. sæti með 20 stig eftir 11 leiki og er fimm stigum á eftir Chelsea sem eiga leik gegn Liverpool seinna í dag. Newcastle er hins vegar með 17 stig í fjórða sæti deildarinnar og var þetta þriðji sigurleikur þeirra svarthvítu í röð í deildinni.

Arsenal 0-1 Newcastle

0-1 Andy Carroll (45.)

Byrjunarlið Arsenal: Fabianski, Sagna, Koscielny, Squillaci, Clichy, Song, Wilshere, Fabregas, Walcott, Chamakh, Nasri.

Varamenn: Szczesny, Rosicky, van Persie, Djourou, Arshavin, Eboue, Bendtner.

Byrjujnarlið Newcastle: Krul, Simpson, Coloccini, Williamson, Jose Enrique, Barton, Tiote, Nolan, Gutierrez, Carroll, Ameobi.

Varamenn: Soderberg, Campbell, Routledge, Lovenkrands, Smith, Steven Taylor, Ranger.