Wenger vill landsleikjafrí einu sinni á ári

Arsene Wenger, stjóri Arsenal, vill að landslið heimsins komi aðeins einu sinni saman á ári og verði þá saman í einn mánuð.

Wenger hefur gagnrýnt tímasetningu á vináttulandsleik Englands og Frakklands miðvikudaginn 17. nóvember næstkomandi en það er alþjóðlegur leikdagur. Ísland mætir Ísrael ytra á þessum degi.

„Leikmenn geta mætt á mánudeginum en hvað geta þeir gert þá? Ekkert, því flestir þeirra munu hafa spilað á sunnudeginum," sagði Wenger.

„Þeir spila svo á miðvikudeginum og fara svo heim. Þá væri strax betra að leyfa leikmönnum að fara í einn mánuð á ári," bætti hann við.