Hermann kom við sögu í sigurleik Portsmouth

Hermann Hreiðarsson kom inn á sem varamaður þegar að Portsmouth gerði sér lítið fyrir og vann sterkt lið Swansea á útivelli í ensku B-deildinni í gær, 2-1.

Hermann hefur verið að koma sér aftur af stað eftir að hafa slitið hásin í mars fyrr á þessu ári og þetta var í fjórða sinn sem hann kemur inn á sem varamaður hjá Portsmouth á undanförnum vikum.

Endurkoma Hermanns virðast hafa góð áhrif á Portsmouth því liðið hefur ekki tapað þegar Hermann hefur komið við sögu - unnið þrjá og gert eitt jafntefli.

Craig Beattie kom Swansea yfir strax á 2. mínútu en David Nugent jafnaði metin undir lok fyrri hálfleiks. Greg Halford tryggði svo Portsmouth sigurinn með marki á 65. mínútu.

Portsmouth er í tólfta sæti deildarinnar með 25 stig eftir nítján leiki en QPR er á toppnum með 38 stig. Swansea er í þriðja sætinu með 33 stig.