Kristinn dæmir Balkanskaga-slag á föstudaginn

Kristinn Jakobsson mun dæma leik í undankeppni EM á föstudaginn en hann og þrír aðrir íslenskir dómarar eru á leiðinni til Tirana í Albaníu til þess að dæma leik Albaníu og Bosníu Hersegóvínu í D riðli undankeppni EM.

Albanía og Bosnía eru bæði á Balkanskaganum og leikurinn er því sannkallaður nágrannaslagur. Albanir eru í efsta sæti D-riðils með 4 stig út úr fyrstu tveimur leikjum sínum en Bosníumenn töpuðu síðasta leik á móti Frökkum og eru í 4. sæti riðilsins.

Kristni til aðstoðar verða þeir Sigurður Óli Þorleifsson og Ólafur Ingvar Guðfinnsson. Fjórði dómari verður svo Magnús Þórisson.