Ingvar: Lyginni líkast

Ingvar Þór Kale, markvörður Breiðabliks, átti frábært tímabil í sumar og hélt marki sínu hreinu er Blikar tryggðu sér titilinn með markalausu jafntefli við Stjörnuna.

„Þetta tímabil hefur verið lyginni líkust," sagði Ingvar. „Þetta er örugglega skemmtilegasta tímabilið á Íslandsmótinu frá 1991 og það er frábært að vinna titilinn þegar það er svona mikil spenna í toppbaráttunni. Það gerir þetta mun sætara fyrir vikið."

Breiðablik hlaut jafn mörg stig og FH og vann því titilinn á betra markahlutfalli.

„Við fengum á okkur fæst mörk allra liða í sumar og það er eitthvað sem maður stefnir á allt tímabilið. Þetta hefur verið gott sumar og ég er mjög sáttur við mitt. Þetta er mitt besta tímabil á ferlinum og toppar allt annað."

„Það sem mestu máli skiptir var stöðugleikinn. Þó svo að við töpuðum einum leik þá unnum við næstu fimm," bætti Ingvar við sem segir framtíðina bjarta hjá Breiðabliki.

„Strákarnir eru árinu eldri og reynslunni ríkari. Þeir eru engir kjúklingar lengur eins og margir hafa verið að tala um. Ef við höldum svipuðum leikmannahóp og bætum aðeins við okkur þá verðum við all svakalegir á næsta ári."