Rooney sendur til Bandaríkjanna

Manchester United hefur ákveðið að senda Wayne Rooney til Bandaríkjanna þar sem hann mun gangast undir stífa endurhæfingu vegna ökklameiðsla sinna.

Rooney mun missa af leik United gegn Manchester City í næstu viku og er ekki búist við því að hann muni geta spilað á ný fyrr en eftir þrjár vikur.

„Hann getur farið þangað og sleppt við þá fjölmiðlaathygli sem hann fær hér," sagði Mike Phelan, aðstoðarstjóri United. „Við erum allir sammála um að hann þurfi á þessu að halda."

Rooney var mikið í sviðsljósinu í síðasta mánuði þegar hann gaf í skyn að hann vildi fara frá United. En nokkrum dögum síðar skrifaði hann undir nýjan fimm ára samning við félagið.

„Við töldum að það væri góð hugmynd fyrir hann að breyta um umhverfi. Ef allt gengur eftir verður hann orðinn klár í slaginn þegar hann kemur til baka."