Van der Vaart tæpur fyrir helgina

Rafael van der Vaart er tæpur fyrir leik Tottenham gegn Bolton í ensku úrvalsdeildinni sem fer fram í hádeginu á morgun.

Van der Vaart meiddist í leik gegn Manchester United í síðustu helgi. Hann var engu að síður í byrjunarliðinu þegar að Tottenham mætti Inter í Meistaradeild Evrópu á þriðjudagskvöldið en þurfti að fara af velli í hálfleik vegna meiðsla.

„Við verðum bara að sjá til," sagði Harry Redknapp, stjóri Tottenham, en líklegt er að það komi betur í ljós eftir æfingu dagsins.

Ef hann spilar ekki er líklegt að Wilson Palacios, Sandro eða Jermaine Jenas taki stöðu hans í byrjunarliðinu en Tottenham hefur ekki unnið í síðustu tíu leikjum sínum gegn Bolton á útivelli.