Alex vill klára ferilinn hjá Chelsea

Brasilíumaðurinn Alex er ánægður hjá Chelsea og vill vera hjá félaginu þar til að ferli hans lýkur. Hann átti aldrei von á því að fá að spila með svo stóru félagi.

Alex skrifaði undir nýjan fjögurra ára samning við félagið á síðustu leiktíð en hann er 28 ára gamall. Hann var í þrjú ár hjá PSV Eindhoven áður en hann kom til Chelsea árið 2007.

Hann hefur verið fastamaður í vörn liðsins og spilað við hlið John Terry. „Það er góð tilfinning að vera hérna. Það er mér mikilvægt og ég er afar hamingjusamur," sagði Alex við enska fjölmiðla.

„Ég átti aldrei von á því að ég fengi tækifæri til að koma til Englands og spila meira en 100 leiki með stóru liði eins og Chelsea. Ég vona að ég verði hérna áfram og spili 200 eða 300 leiki. Mér líður eins og ég sé heima hjá mér og ég vona að ég verði hér þar til að ferli mínum lýkur."