Ræðst í fyrramálið í hvaða nefnd þingsályktunartillagan fer

Það ræðst í fyrramálið klukkan hálf ellefu hvort að þingsályktunartillaga um málshöfðun gegn fjórum fyrrverandi ráðherrum fari til meðferðar í þingmannanefndinni eða allsherjarnefnd.

Atli Gíslason, formaður þingmannanefndarinnar, hefur sjálfur lýst því yfir að ef málið fari í allsherjarnefndina muni það deyja út. Hann hefur einnig bent á að það sé lögbrot að vísa tillögunum til nefndarinnar.

„Ég hef ekkert á móti því að þetta færi í þingmannanefndina, en ég teldi líka eðlilegt að þetta færi í allsherjarnefndina," segir Róbert Marshall, formaður allsherjarnefndar, í samtali við Vísi. „Það er alveg sjálfsagt að þingmannanefndin fái þetta til skoðunar, en það þýðir ekki að það sé bundið þar. Það er ekkert því til fyrirstöðu að mál fari inn til meðferðar í tveimur nefndum og ef það kemur úrskurður um að málið fari í allsherjarnefnd þá hef ég lýst minni skoðun á því," segir Róbert.

Hann segir að málið gæti alveg endað inn á borði allsherjarnefndar, ef þingið myndi taka afstöðu til þess. „Þetta er þannig mál að það borgar sig að vinna það eins vel og hægt er og reyna að ná eins mikilli samstöðu og hægt er. Ef einhver hluti þingmanna óskar eftir því að fá það inn til umfjöllunar, í því sem helst gæti talist fagnefnd á þessu sviði, þá væri það undir allsherjarnefnd. Og það er ekkert nema sjálfsagt að verða við því," segir hann. „Það er mjög eðlilegt að það komi fram í annari nefnd en þeirri sem lagði það fram."