Vodafone býður viðskiptavinum að hringja frítt

Viðskiptavinum Vodafone býðst um helgina að hringja frítt úr heimilissímanum til útlanda, í tilefni af kynningarátaki Íslensku þjóðarinnar sem ætlað er að laða erlenda ferðamenn til Íslands.

Með því vill Vodafone leggja sitt af mörkum svo Íslendingar geti talað við vini og ættingja erlendis og hvatt þá til að kynna sér áfangastaðinn Ísland eins og segir í tilkynningu frá símafyrirtækinu.

Það var Síminn sem reið á vaðið og nú fylgir Vodafone á eftir.

Tilboðið um frí símtöl úr heimasímanum gildir í tvo sólarhringa, frá miðnætti aðfararnótt laugardags til miðnættis aðfararnótt mánudags. Það gildir um símtöl í heimasíma og GSM síma erlendis, en ekki í símanúmer sem bera yfirverð - t.d. söfnunarnúmer eða þjónustunúmer.