Innlent

Telur mjólkurfrumvarpið kalla á endurskoðun landbúnaðarkerfisins

Þórunn Sveinbjarnardóttir, þingflokksformaður Samfylkingarinnar, segir að vegna mjólkurfrumvarpsins verði að endurskoða landbúnaðarkerfið frá grunni.
Þórunn Sveinbjarnardóttir, þingflokksformaður Samfylkingarinnar, segir að vegna mjólkurfrumvarpsins verði að endurskoða landbúnaðarkerfið frá grunni.
Ekki ríkir sátt um mjólkurfrumvarp landbúnaðarráðherra milli stjórnarflokkanna, en Þórunn Sveinbjarnardóttir þingflokksformaður Samfylkingarinnar segir að flokkurinn hafi gert grundvallarathugasemdir við að hugsanlega bryti frumvarpið gegn stjórnarskrá. Hún segist vona að umræðan um frumvarpið verði til þess að landbúnaðarkerfið verði endurskoðað frá grunni.

Frumvarpið felur í sér að fésektir verði lagðar á mjólkursamlög sem taka við mjólk til sölu innanlands frá framleiðendum umfram framleiðslukvóta, en skiptar skoðanir eru um frumvarpið. Samkeppnisstofnun, Samtök verslunar og þjónustu og Neytendastofa hafa gert alvarlegar athugasemdir við frumvarpið, en bæði Samtök ungra bænda og Landssamband kúabænda hafa lýst við það stuðningi.

Þórunn segir ágreining um frumvarpið helst snúa að því hvort það brjóti í bága við atvinnufrelsisákvæði stjórnarskrár og segist ekki telja að sátt ríki um málið í þinginu. „Það hefur verið ljóst frá í upphafi það er grundvallarágreiningur um málið og það varðar sérstaklega hvort að frumvarpið eða breytingar á lögunum fari í bága við stjórnarskrá," segir Þórunn.

Samfylkingin hafi gert grundvallarathugasemdir við að hugsanlega bryti frumvarpið gegn stjórnarskránni og það prinsippmál standi óhaggað. Hins vegar sé það þingsins að leiða málið til lykta.

Þórunn segir löngu tímabært að taka allt landbúnaðarkerfið til grundvallarendurskoðunar. „Kannski og vonandi verður umræðan um þetta mál til þess að við einhendum okkur í það."


Tengdar fréttir

Undanþága Jóns á við tvær góðar kýr utan kvóta

Mjólkurfrumvarp sjávarútvegs- og landbúnaðarráðherra gerir ráð fyrir undanþágu handa þeim sem framleiða 15 þúsund lítra af mjólkurafurðum í heimaframleiðslu utan kvótakerfis, en þeim verður ekki refsað. Magnið jafngildir ársframleiðslu tveggja góðra mjólkurkúa.

Ungir bændur ánægðir með Jón

Stjórn Samtaka ungra bænda fagnar frumvarpi sem Jón Bjarnason sjávarútvegs og landbúnaðarráðherra hefur lagt fram um breytingar á búvörulögum og telur stjórn Samtaka ungra bænda að fyrirhugaðar breytingar á búvörulögum verði til þess fallnar að styrkja grundvöll mjólkurframleiðslu í hinum dreifðu byggðum landsins.

Þingmaður Framsóknar: Ekkert nýtt í umsögn Samkeppniseftirlitsins

Fulltrúi Framsóknarflokks í landbúnaðarnefnd segir ekkert nýtt í umsögn Samkeppniseftirlitsins um mjólkurfrumvarp landbúnaðarráðherra, en eftirlitið gerir alvarlegar athugasemdir við frumvarpið. Hann segir að reglur þurfi að gilda um markaðinn og óheft samkeppni og markaðshyggja hafi ekki farið vel með Vesturlönd.

Vinnur gegn hagsmunum bænda og neytenda

Neytendasamtökin fullyrða að mjólkurfrumvarp landbúnaðarráðherra vinni gegn hagsmunum bænda og neytenda. Verði frumvarpið samþykkt verður einokun fest í sessi að mati samtakanna og því vilja þau að frumvarpið verði fellt á Alþingi.

Sjálfstæðismenn styðja mjólkurfrumvarp

Annar fulltrúa Sjálfstæðisflokks í landbúnaðarnefnd segist standa við stuðning sinn við mjólkurfrumvarp landbúnaðarráðherra, en hinn segir gagnrýni á frumvarpið sem fram hefur komið ekki eiga rétt á sér. Báðir eru þeir þó sammála um að landbúnaðarnefnd þurfi að fara yfir málið í ljósi gagnrýninnar og útiloka ekki að frumvarpið taki breytingum.

Á móti mjólkurfrumvarpi Jóns

Frjálshyggjufélagið legst eindregið gegn frumvarpi Jóns Bjarnasonar landbúnaðarráðherra um að refsa beri afurðastöðvum, sem kaupa mjólk, sem er farmleidd er án ríkisstyrkja. Í ályktun félagsins segir enn fremur að hér sé á ferðinni gróf aðför að atvinnufrelsi í landinu og til þess ætluð að vernda einokun og fákeppni gamla tímans.

Einokun fest í sessi

Með mjólkurfrumvarpi landbúnaðarráðherra verður einokun fest í sessi þar sem nær útilokað verður fyrir nýja aðila að hefja starfsemi með úrvinnslu á mjólkurafurðum. Þetta er mat Samtaka verslunar og þjónustu en samtökin gera alvarlegar gera athugasemdir í umsögn við frumvarpið.

Ráðherra greinir á um ágæti mjólkurfrumvarps

Fjármálaráðherra segist ósammála Samkeppniseftirlitinu um að mjólkurfrumvarp landbúnaðarráðherra sé skaðlegt samkeppni. Þá greinir efnahags- og viðskiptaráðherra og fjármálaráðherra á um kosti frumvarpsins, en sá fyrrnefndi er sammála sjónarmiðum Samkeppniseftirlitsins.

Ýtir undir nýsköpun og skerpir núgildandi lög

Formaður Bændasamtakanna fagnar nýju mjólkurfrumvarpi. Hann segir að mjólkursamlögum sé þegar bannað að taka við mjólk frá framleiðendum umfram kvóta til sölu. Nú sé verið að skerpa á löggjöfinni hvernig taka eigi á þeim sem brjóta lögin.

Mest lesið


Fleiri fréttir

Sjá meira


×

Mest lesið