Þingmaður Framsóknar: Ekkert nýtt í umsögn Samkeppniseftirlitsins

Fulltrúi Framsóknarflokks í landbúnaðarnefnd segir ekkert nýtt í umsögn Samkeppniseftirlitsins um mjólkurfrumvarp landbúnaðarráðherra, en eftirlitið gerir alvarlegar athugasemdir við frumvarpið. Hann segir að reglur þurfi að gilda um markaðinn og óheft samkeppni og markaðshyggja hafi ekki farið vel með Vesturlönd.

Samkeppniseftirlitið hefur gert alvarlegar athugasemdir við nýtt frumvarp landbúnaðarráðherra, en samkvæmt frumvarpinu verða lagðar fjársektir á mjólkursamlög fyrir að taka við mjólk frá framleiðanda sem ekki hefur svokallað greiðslumark, eins konar framleiðslukvóta. Eftirlitið segir frumvarpið takmarka samkeppni á mjólkurmarkaði og festa þannig enn frekar í sessi samkeppnishömlur, neytendum og bændum til tjóns.

Sigurður Ingi Jóhannsson, fulltrúi Framsóknarflokks í sjávarútvegs- og landbúnaðarnefnd Alþingis, segir ekkert nýtt í umsögn Samkeppniseftirlitsins. „Þetta eru ekki ný viðbrögð frá Samkeppniseftirlitinu eða samkeppnisstofnunum. Eftir að samkeppnisyfirvöld á sínum tíma leyfðu samruna Hagkaupa, Bónusbúðanna og klukkubúðanna hefur engin samkeppni verið á matvörumarkaði þannig að þetta er þekkt umræða," segir Sigurður Ingi.

„Blandað hagkerfi er það sem hentar okkur Íslendingum og flestum vestrænum þjóðum best. Óheft markaðshyggja og samkeppni hefur ekki farið sérstaklega vel með Vesturlönd á síðastliðnum 10-15 ár. Það er ekkert nýtt að það skuli vera einhverjar reglur á markaði til að fara eftir."

Spurður hvort eðlilegt sé að það liggi fjársektir við framleiðslu án ríkisstyrkja segir Sigurður: „Já. Í þessu tilfelli snýst þetta ekki fyrst og fremst um samkeppni heldur um það að einhver sektarákvæði gildi um þá sem brjóta samninga við ríkið. Menn hafa verið að blanda samkeppnissjónarmiðum inn í umræðuna en það hefur ekkert með það að gera."

Sigurður segir það geti vel verið að frumvarpið sé samkeppnishamlandi.

Þá segist Sigurður telja að tillit verði tekið til allra athugasemda í starfi landbúnaðarnefndar, en segist munu styðja frumvarpið eins og það liggur fyrir.