Kuyt ánægður fyrir hönd Torres

Dirk Kuyt segir að allir leikmenn Liverpool höfðu fulla trú á því að Fernando Torres myndi komast aftur í sitt besta form en hann skoraði bæði mörkin í 2-0 sigri liðsins á Chelsea um helgina.

Sjálfur sagði Torres eftir leikinn að hann ætti enn eftir að ná sínu besta fram eftir langverandi baráttu við meiðsli fram eftir ári.

„Við höfðum alltaf trú á Fernando," sagði Kuyt í viðtali á heimasíðu Liverpool. „Liðið hefur verið að bæta sig með hverjum leiknum og Fernando er alltaf að verða betri og betri."

„Mörkin hans voru frábær og við erum ánægðir með frammistöðu alls liðsins. Við spiluðum virkilega vel í fyrri hálfleik og stóðum okkur svo vel í varnarleiknum í þeim síðari."

„Pepe var frábær, enn og aftur. Hann hélt hreinu enn einu sinni og stóð sig frábærlega."

Kuyt hafði sjálfur misst af síðustu fimm leikjum Liverpool vegna meiðsla en lagði upp fyrra mark Torres með glæsilegri sendingu.

„Það var frábært augnablik fyrir mig í leiknum. Ég hef lagt mikið á mig til að koma mér aftur af stað. Það var ekki auðvelt að byrja á Chelsea en þetta var góður dagur."