Stoke vann langþráðan sigur á Birmingham

Stoke City endaði fjögurra leikja taphrinu í ensku úrvalsdeildinni með 3-2 heimasigri á Birmingham í ensku úrvalsdeildinni í kvöld. Eiður Smári Guðjohnsen sat allan tímanna á bekknum en Dean Whitehead skoraði sigurmark Stoke-liðsins fimm mínútum fyrir leikslok.

Robert Huth bar fyrirliðabandið hjá Stoke í fjarveru Ryan Shawcross og kom sínum mönnum í 1-0 með marki rétt fyrir hálfleik. Ricardo Fuller reyndi þá skot sem fór af varnarmanni og til Huth sem skoraði auðveldlega úr miðjum vítateignum.Þetta var aðeins annað mark Stoke í fyrri hálfleik á tímabilinu en liðið hafði verið markalaust í fyrri hálfleik í níu leikjum í röð fyrir leikinn í kvöld.

Stoke var miklu betra í fyrri hálfleik en í þeim síðari fór Birmingham-liðið að ógna meira. Birmingham átti þannig nokkur góð færi á stuttum tíma um miðjan hálfleikinn en aðeins skömmu seinna kom Ricardo Fuller Stoke í 2-0 með frábæru marki eftir einstaklingsframtak.

Það tók Birmingham þó aðeins fjórar mínútur að jafna leikinn. Varamaðurinn Keith Fahey skoraði fyrst eftir sendingu frá Nikola Zigic og Cameron Jerome jafnaði síðan eftir fyrirgjöf frá Sebastian Larsson.

Stoke-menn tryggðu sér hinsvegar öll þrjú stigin á 85. mínútu þegar Dean Whitehead skoraði eftir sendingu Matthew Etherington og klaufagang í vörn Birmingham. Þetta var fyrsta mark Whitehead í þrjú ár og í 85 leikjum.

Eiður Smári Guðjohnsen kom ekki við sögu hjá Stoke og er þetta þriðji leikurinn í röð þar sem hann annaðhvort situr á bekknum allan tímann eða að hann er ekki leikmannahópnum hjá Tony Pulis.

Stoke vann þarna sinn fyrsta deildarleik síðan 2. október (1-0 á Blackburn) en liðið komst með honum upp í 15. sæti deildarinnar og fór upp fyrir Birmingham.