Tottenham náði aðeins jafntefli á móti Sunderland

Tottenham og Sunderland gerðu 1-1 jafntefli á White Hart Lane í ensku úrvalsdeildinni í kvöld en liðin eru því áfram með jafnmörg stig í 6. og 7. sæti deildarinnar.

Tottenham hefur þar með ekki náð að vinna síðustu fjóra leiki sína í deildinni og Harry Redknapp, stjóri Spurs, gat ekki verið sáttur með uppkeru kvöldsins því Tottenham var með yfirburði stóran hluta leiksins.

Tottenham var mun meira með boltann í fyrri hálfleik en náði ekki að skapa sér nein dauðafæri þrátt fyrir nokkrar ágætar tilraunir. Craig Gordon, stóð sig vel í markinu hjá Sunderland en Sunderland-liðið átti í vök að verjast allan hálfleikinn.

Pressa Tottenham jókst áfram í seinni hálfleik og það var síðan Raphael van der Vaart sem braut loksins ísinn á 64. mínútu. Markið var keimlíkt marki hans á móti Everton á dögunum en hann skoraði af stuttu færi eftir að Peter Crouch hafði skallaði til hans fyrirgjöf frá Gareth Bale.

Asamoah Gyan náði hinsvegar að jafna leikinn aðeins þremur mínútum síðar. William Gallas og Younes Kaboul gerðu þá mistök eftir sendingu Danny Welbeck í gegnum miðja vörnina og boltinn datt fyrir fætur Ganamannsins sem skoraði laglega sitt þriðja mark í tveimur leikjum.