Ekki skvetta jógúrt ef hinn bílstjórinn er með skammbyssu

Gerald Williams varð öskuvondur þegar Mark Flannery svínaði fyrir hann á Interstate 95 í Virginíu. Gerald keyrði Lexusinn alveg upp að Toyota Rav4 jeppa Marks og hékk þar. Mark svaraði með því að smábremsa öðru hvoru. Þannig óku þeir í rykkjum eftir Interstate 98 og urðu sífellt reiðari. Loks missti Gerald alveg stjórn á sér. Hann reif upp jógúrt dollu af farþegasætinu og grýtti henni í Toyotuna. Mark dró þá upp skammbyssu og miðaði á Lexusinn.

Mórallinn í sögunni

Sem betur fer höfðu þeir þó vit á að hringja í neyðarlínuna. Báðir í einu. Lögreglan skipaði þeim að beygja út í útskot þar sem lögreglumaður handtók þá báða. Gerald Williams var ákærður fyrir að kasta aðskotahlut í bifreið á ferð, sem er alvarlegur glæpur.

Mark Flannery var ákærður fyrir að aka ógætilega og veifa skammbyssu. Það telst smávægilegt umferðarlagabrot. Mórallinn í þessari sögu er náttúrlega sá að ef þú ert að fara að keyra í Bandaríkjunum skaltu frekar skjóta aðra bílstjóra, en gefa þeim jógúrt.