Heimir: Óska Ólafi til hamingju

Heimir Guðjónsson var sáttur við sína menn eftir 3-0 sigur FH á Fram í lokaumferð Pepsi-deildar karla í gær.

FH jafnaði þar með Breiðablik að stigum en síðarnefnda liðið tryggði sér Íslandsmeistaratitilinn á markatölu.

„Við gerðum það sem í okkar valdi stóð og kláruðum þetta mót með sæmd en ég vil nota tækifærið og óska Breiðabliki til hamingju með meistaratitilinn og sérstaklega þjálfaranum Ólafi Kristjánssyni því hann á þetta skilið," sagði Heimir.

„Við gerðum það sem við þurftum að gera í þessum leik og spiluðum ekkert sérstaklega vel. Mér fannst við alltaf vera liðið sem vildi vinna þennan leik. Við komum út og vorum að sækja á mörgum mönnum og Framliðið er bara þannig samsett að þeir eru vel skipulagðir og svo beita þeir skyndísóknum. Við vorum að hleypa þeim í skyndisóknirnar í fyrri hálfleik en í seinni hálfleik fannst mér þetta aldre vera spurning."

Gunnar Kristjánsson skoraði tvö marka FH í gær eftir að hann kom inn á sem varamaður fyrir Björn Daníel Sverrisson.

„Gunni Kristjáns kom í þenann klúbb í glugganum og hefur staðið sig mjög vel þegar hann hefur verið að koma inn á. Staðan var 0-0 og við þurftum að sækja þessi stig. Hann kom sterkur inn í leikinn."

FH-ingar þurfa nú að sætta sig við annað sæti Pepsi-deildar karla í ár en liðið varð bikarmeistari fyrr í sumar.

„Við stefndum að því að vinna tvöfalt í sumar og það er nú bara þannig hjá FH að það er krafa um það að það sé verið að keppa um þessa titla sem eru í boði. Við getum því ekki verið sáttir eftir þetta sumar en verðum bara að safna liðið og vera klárir fyrir næsta tímabil."

„Við vorum sjálfum okkur verstir á köflum í sumar og vantaði að menn leggðu harðar að sér í nokkrum leikjum. Engu að síður þá reyndum við og við unnum sex síðustu leikina í deildinni."

„Ég er búinn að vera í þrjú ár með þetta lið og þetta er lélegasta tímabilið. Við fengum 47 stig árið 2008, 51 stig 2009 og 44 stig núna sem er slakasti árangurinn undir minni stjórn. Við þurfum að setjast niður eftir tímabilið og reyna að bæta okkar leik."

„Ég reikna með því að leikmennirnir verði áfram og það er góður kjarni í FH. Það er að koma upp mikið af öflugum strákum og FH er ekkert að fara að gefast upp. Við munum mæta sterkir til leiks að ári."