Mancini hefur ekki áhyggjur af Balotelli

Roberto Mancini, stjóri Manchester City, hefur ekki áhyggjur af hegðun Mario Balotelli sem fékk að líta rauða spjaldið í leik City gegn West Brom um helgina.

Balotelli, sem er tvítugur, lenti margsinnis í vandræðum þegar hann spilaði með Inter á Ítalíu og lenti upp á kant við Jose Mourinho, þáverandi stjóra Inter.

Hann var svo keyptur til City í sumar fyrri 24 milljónir punda og hann skoraði bæði mörkin í 2-0 sigrinum á West Brom, áður en hann var rekinn af velli.

„Mario er ungur og frábær leikmaður en gerir stundum mistök. Það er eðlilegt," sagði Mancini.

„En refsingin í leiknum um helgina var of þung. Ég vona að hann haldi áfram að bæta sig enda mikilvægt fyrir leikmenn á hans aldri."