Sir Alex Ferguson: Manchester City ætlar að kaupa sér titilinn

Sir Alex Ferguson, stjóri Manchester United, fer með liðið sitt í heimsókn til nágrannanna í Manchester City á miðvikudaginn og skoski stjórinn notaði tækifærið til að kynda aðeins undir nágrannarígnum

„Það er aðeins meira undir í þessum leik en vanalega af því að þeir eru í toppbaráttunni," sagði Sir Alex Ferguson við Guardian.

Manchester United er tveimur stigum á eftir toppliði Chelsea og er með þremur stigum meira en City-liðið. Ferguson telur að City-menn eigi raunhæfa möguleika á því að vinna titilinn.

„Við vitum vel hvers konar peningaupphæðum þeir eru að eyða. Þeir keyptu fimm eða sex leikmenn í sumar og þeir munu halda áfram að eyða í leikmenn þangað til að þeir fara að vinna titla. Við gerum okkur grein fyrir þessu og reynum bara að vinna með því," segir Ferguson sem segist ekki getað beðið eftir leiknum á morgun.