Ofurölvaður maður reyndi að endurlífga pokarottu

Lögreglan í Pennsylvaniu í Bandaríkjunum hefur ákært mann fyrir ölvun á almannafæri eftir að hann reyndi að endurlífga dauða pokarottu sem hafði verið ekið yfir á þjóðvegi nærri Pittsburgh.

Samkvæmt fréttavef BBC á Donald Wolfe, sem er 55 ára gamall, að hafa reynt munn við munn aðferðina á dauðri pokarottu á þjóðveginum um 105 kílómetra frá borginni Pittsburgh.

Vitni sem sáu manninn lýsa hegðun hans þannig að hann hafi bograð yfir hræinu, gefið því hjartahnoð og endað á því að reyna munn við munn aðferðina til þess að blása lífi í það.

Lögreglan kom svo á vettvang stuttu síðar og handtók manninn sem var ofurölvaður.

Pokarottur eru á stærð við heimiliskött. Ekki er óalgengt að það sé ekið á dýrin á þjóðveginum á þessum slóðum.

Skemmst er frá því að segja að endurlífgunartilraunir mannsins báru ekki árangur.